☆ ᠴ·ᠪᠠᠶᠠᠰᠤᠯ
ᠴᠢᠮᠢ᠋ᠢ ᠬᠠᠷᠠᠬᠤ ᠪᠠᠷ ᠵᠢᠷᠭᠠᠯ ᠢᠷᠠᠨᠠ
（ᠭᠠᠳᠠᠨᠠ ᠨᠢᠭᠡ）
ᠨᠠᠭᠤᠷ ᠤᠨ ᠬᠤᠨ ᠰᠢᠭ ᠨᠠᠮᠪᠠ ᠴᠤᠪᠣᠭᠤᠯᠢᠭ
ᠨᠠᠭᠠᠯᠢᠩᠬᠠᠢ ᠬᠤᠩᠭ᠋ᠤᠷ ᠪᠦᠰᠡᠭᠦᠢ ᠴᠢᠮᠠ ᠲᠡᠶ
ᠨᠠᠷᠠᠳᠤ ᠶᠢᠨ ᠵᠠᠢ ᠳᠤ ᠰᠤᠴᠢᠮᠠᠭ ᠣᠴᠠᠷᠠᠭᠠᠤᠨ
ᠨᠠᠢ᠌ᠷ ᠤᠨ ᠬᠠᠯᠠᠭᠤᠨ ᠳᠤ ᠰᠤᠯᠢᠶᠠᠷᠠᠵᠤ ᠶᠠᠪᠣᠯᠠ᠂
ᠳᠦᠷᠰᠦᠭᠦᠢ ᠪᠣᠯᠭᠢᠳᠠᠭ ᠴᠠᠭ ᠡᠴᠡ ᠥᠩᠭᠡᠷᠡᠭ᠍ᠰᠡᠨ ᠴᠤ
ᠳᠤᠯᠤᠭᠠᠤᠨ ᠢᠷᠡᠴᠢᠭᠡᠭ᠍ᠰᠡᠨ ᠵᠢᠷᠭᠠᠯ ᠪᠣᠯᠬᠤᠷ
ᠳᠤᠭᠳᠤᠯᠤᠨ ᠳᠤᠭᠳᠤᠯᠤᠨ ᠴᠢᠮᠢ᠋ᠢ ᠪᠠᠨ ᠬᠠᠷᠠᠬᠤ ᠳᠤ
ᠳᠠᠭᠤᠤ ᠶᠢᠨ ᠨᠤᠲ᠋ ᠰᠢᠭ ᠡᠭᠡᠰᠢᠭᠯᠡᠵᠤ ᠰᠠᠨᠠᠭᠳᠠᠪᠠ ᠡ᠃
ᠠᠭᠤᠯᠠ ᠶᠢᠨ ᠰᠤᠭᠤ ᠰᠢᠭ ᠠᠯᠢᠶᠠ ᠳᠡᠭ᠍ᠵᠢᠨ
ᠣᠶᠠᠬᠠᠨ ᠳᠦᠷᠦᠭ᠍ᠰᠡᠨ ᠪᠦᠰᠡᠭᠦᠢ ᠴᠢᠮᠠ ᠲᠡᠶ
ᠠᠮᠢᠳᠤᠷᠠᠯ ᠤᠨ ᠵᠠᠮ ᠳᠠᠭᠠᠨ ᠣᠭᠵᠤᠮ ᠬᠠᠷᠭᠤᠭᠠᠤᠨ
ᠠᠮᠠᠷᠠᠭ ᠰᠠᠷᠬᠤᠤᠨ ᠲᠤ ᠰᠤᠭᠳᠤᠭᠤᠷᠠᠵᠤ ᠭᠠᠷᠤᠯᠠ᠂
ᠬᠠᠮᠢᠶᠠ ᠦᠭᠡᠶ ᠳᠤᠭᠯᠠᠳᠠᠭ ᠨᠠᠰᠤᠨ ᠡᠴᠡ ᠭᠡᠳᠦᠷᠡᠭ᠍ᠰᠡᠨ ᠴᠤ
ᠭᠦᠷᠦᠭᠡᠤᠨ ᠢᠷᠡᠴᠢᠭᠡᠭ᠍ᠰᠡᠨ ᠵᠢᠷᠭᠠᠯ ᠪᠣᠯᠬᠤᠷ
ᠬᠠᠢ᠌ᠷᠠᠯᠠᠨ ᠬᠠᠢ᠌ᠷᠠᠯᠠᠨ ᠴᠢᠮᠢ᠋ᠢ ᠪᠠᠨ ᠬᠠᠷᠠᠬᠤ ᠳᠤ
ᠬᠤᠭᠤᠷ ᠤᠨ ᠠᠶᠠ ᠰᠢᠭ ᠭᠦᠭ᠍ᠵᠢᠮᠯᠡᠵᠤ ᠰᠠᠨᠠᠭᠳᠠᠪᠠ ᠡ᠃
ᠭᠡᠭᠡᠷᠡ ᠶᠢᠨ ᠴᠡᠴᠡᠭ᠌ ᠰᠢᠭ᠌ ᠰᠤᠷᠭᠤᠭ ᠭᠠᠩᠭ᠋ᠠᠩ
ᠭᠦᠰᠡᠯ ᠤᠨ ᠰᠠᠢ᠌ᠬᠠᠨ ᠪᠦᠰᠡᠭᠦᠢ ᠴᠢᠮᠠ ᠲᠡᠶ
ᠬᠤᠯᠠ ᠶᠢᠨ ᠠᠶᠠᠨ ᠳᠠᠭᠠᠨ ᠭᠡᠨᠡᠳᠲᠡ ᠯᠠ ᠠᠭᠤᠯᠵᠠᠭᠠᠤᠨ
ᠬᠤᠨᠤᠭ ᠤᠨ ᠵᠡᠭᠦᠳᠤᠨ ᠤ ᠮᠥᠷᠦᠭᠡᠳᠦᠯ ᠳᠤ ᠣᠨᠠᠯᠠ᠂
ᠠᠭᠠᠯᠢᠭᠦᠢ ᠵᠠᠩᠨᠠᠳᠠᠭ ᠦᠶᠡ ᠡᠴᠡ ᠵᠠᠢ᠌ᠳᠠᠭᠰᠠᠨ ᠴᠤ
ᠠᠶᠠᠠᠳᠠᠭᠠᠨ ᠢᠷᠡᠴᠢᠭᠡᠭ᠍ᠰᠡᠨ ᠵᠢᠷᠭᠠᠯ ᠪᠣᠯᠬᠤᠷ
ᠱᠤᠬᠤᠭᠤᠷᠬᠠᠨ ᠱᠤᠬᠤᠭᠤᠷᠬᠠᠨ ᠴᠢᠮᠢ᠋ᠢ ᠪᠠᠨ ᠬᠠᠷᠠᠬᠤ ᠳᠤ
ᠰᠢᠯᠦᠭ᠌ ᠤᠨ ᠠᠢ᠌ᠵᠠᠮ ᠰᠢᠭ ᠣᠶᠠᠩᠭ᠋ᠠᠷᠠᠵᠤ ᠰᠠᠨᠠᠭᠳᠠᠪᠠ ᠡ᠃
ᠬᠠᠪᠢᠷᠭᠠᠨ ᠰᠠᠷᠠ ᠰᠢᠭ ᠭᠡᠭᠡᠡᠴᠢᠷ ᠭᠤᠪᠠᠢ
ᠭᠦᠭᠡᠷᠦᠭᠦᠨ ᠵᠠᠶᠠᠭᠠᠭᠰᠠᠨ ᠪᠦᠰᠡᠭᠦᠢ ᠴᠢᠮᠠ ᠲᠡᠶ
ᠬᠤᠷᠸᠠ ᠶᠢᠨ ᠠᠭᠤᠳᠠᠮ ᠳᠤ ᠢᠷᠦᠭᠡᠯ ᠲᠡᠶ ᠵᠤᠯᠭᠠᠭᠠᠤᠨ
ᠬᠤᠷᠢᠭᠠ ᠲᠡᠶ ᠵᠢᠮᠢᠰ ᠢ ᠬᠤᠯᠠᠭᠠᠢ᠌ᠯᠠᠵᠤ ᠢᠳᠠᠯᠠ᠂
ᠥᠶᠡᠷᠭᠡᠵᠤ ᠠᠯᠢᠶᠠᠷᠬᠠᠳᠠᠭ ᠨᠠᠰᠤᠨ ᠡᠴᠡ ᠬᠤᠯᠠᠳᠠᠭᠰᠠᠨ ᠴᠤ
ᠦᠨᠡᠩᠬᠦ ᠢᠷᠡᠴᠢᠭᠡᠭ᠍ᠰᠡᠨ ᠵᠢᠷᠭᠠᠯ ᠪᠣᠯᠬᠤᠷ
ᠥᠮᠴᠢᠷᠭᠡᠨ ᠥᠮᠴᠢᠷᠭᠡᠨ ᠴᠢᠮᠢ᠋ᠢ ᠪᠠᠨ ᠬᠠᠷᠠᠬᠤ ᠳ᠋ᠤ
ᠦᠨᠢᠳᠠ ᠶᠢᠨ ᠬᠠᠨᠢ ᠰᠢᠭ ᠡ᠊ᠨᠳᠡᠭᠦᠷᠡᠵᠤ ᠰᠠᠨᠠᠭᠳᠠᠪᠠ ᠡ᠃
ᠪᠣᠯᠵᠤᠭᠠᠨ ᠤ ᠰᠦᠨᠢ
ᠬᠤᠯᠠ ᠡᠴᠡ ᠴᠢᠨᠤ ᠪᠠᠷᠠ ᠨᠠᠭᠢᠯᠵᠠᠨ ᠬᠠᠷᠠᠭᠳᠠᠨᠠ
ᠬᠤᠵᠢᠮᠳᠠᠭᠠ ᠦᠭᠡᠶ ᠨᠢ ᠭᠡᠵᠤ
ᠭᠡᠭᠡᠷᠡ ᠶᠢᠨ ᠮᠢᠩᠭ᠋ᠠᠨ ᠴᠡᠴᠡᠭᠡᠰ ᠣᠭᠳᠤᠵᠤ ᠪᠣᠢ᠌ᠯᠠᠨᠠ᠃
ᠰᠠᠷᠠᠨ ᠤ ᠳᠤᠶᠠᠭᠠ ᠰᠦᠨ ᠤ ᠥᠩᠭᠡ ᠪᠠᠷ ᠢᠳᠡᠭᠡᠷᠡᠵᠤ
ᠰᠠᠯᠭᠢᠨ ᠤ ᠵᠥᠭᠡᠯᠡᠨ ᠰᠢᠪᠰᠢᠯᠭᠡᠨ ᠳᠤ
ᠰᠡᠷᠢᠭᠦᠨ ᠭᠤᠷᠤᠬᠠ ᠶᠢᠨ ᠣᠰᠤᠨ ᠠᠷ ᠳᠠᠳᠠᠨ ᠢᠷᠠᠯᠵᠠᠨᠠ᠃
ᠪᠣᠯᠵᠤᠮᠤᠷ ᠤᠳ
ᠬᠠᠶᠠ ᠬᠠᠶᠠ ᠪᠣᠳᠠᠨ ᠤ ᠨᠠᠮᠠᠭᠠ ᠪᠠᠷ ᠠᠯᠢᠶᠠᠯᠠᠨ
ᠪᠣᠯᠵᠤᠭᠠᠨ ᠤ ᠬᠤᠶᠠᠷ ᠢ ᠡᠯᠡᠭᠯᠡᠵᠤ
ᠰᠠᠤᠠᠭᠢᠯ ᠤᠨ ᠭᠡᠯᠡ ᠪᠠᠷ ᠱᠤᠯᠤᠭᠠᠨᠠᠨᠠ᠃
ᠬᠠᠴᠠᠷ ᠳᠡᠭᠡᠷᠡ ᠮᠢᠨᠢ ᠢᠴᠢᠮᠡᠭ᠌ ᠥᠨᠦᠰᠦᠭᠡᠤᠨ
ᠬᠠᠷᠠᠩᠭ᠋ᠤᠢ ᠳᠤᠮᠳᠠᠭᠤᠷ ᠴᠢ ᠳᠠᠯᠳᠠᠷᠢᠵᠤ ᠣᠳᠤᠨᠠ
ᠭᠡᠴᠡᠭᠦᠤ ᠵᠤᠷᠢᠭ ᠲᠡᠶ ᠪᠦᠰᠡᠭᠦᠢ ᠪᠠᠢ᠌ᠨᠠ ᠳ᠋ᠠ ᠭᠡᠵᠤ
ᠭᠡᠭᠦᠳᠡᠭ᠌ ᠳᠤᠳᠤᠷᠠ ᠪᠠᠨ ᠪᠢ ᠬᠠᠢ᠌ᠷᠠ ᠶᠢᠨ ᠳᠠᠭᠠᠤᠠᠬᠠᠯ ᠮᠠᠨᠠᠨᠠ᠃
ᠠᠢ᠌ᠯ ᠤᠨ ᠡᠭᠦᠳᠡᠨ ᠡᠴᠡ ᠬᠠᠢ᠌ᠷᠠ ᠳᠤᠷᠠᠯᠠᠯ ᠰᠠᠯᠭᠢᠯᠠᠵᠤ ᠢᠷᠡᠳᠡᠭ᠌
ᠠᠮᠢᠳᠤᠷᠠᠯ ᠤᠨ ᠬᠠᠷᠭᠤᠢ ᠳᠤ ᠬᠤᠪᠢ ᠵᠠᠶᠠᠭᠠ ᠳᠤᠷᠭᠠᠭᠳᠠᠵᠤ ᠪᠣᠴᠠᠳᠠᠭ᠃
ᠦᠵᠡᠷᠠᠵᠤ ᠬᠠᠭᠤᠴᠢᠷᠠᠭᠰᠠᠨ ᠣᠨ ᠰᠠᠷᠠ ᠶᠢᠨ ᠺᠠᠷᠲ᠋ ᠡᠴᠡ
ᠦᠨᠡᠨ ᠤ ᠭᠡᠷᠡᠴᠢ ᠬᠠᠢ᠌ᠷᠠ ᠨᠠᠢ᠌ᠷ ᠦᠭᠡᠶ ᠪᠠᠯᠠᠯᠤᠭᠳᠠᠨᠠ
ᠶᠠᠪᠣᠳᠠᠯ ᠪᠦᠭᠦᠨ ᠢ ᠡᠷᠭᠢᠴᠡᠭᠦᠯᠵᠤ ᠪᠣᠳᠤᠬᠤᠯᠠ
ᠶᠠᠭ ᠯᠠ ᠥᠩᠭᠡᠷᠡᠭ᠍ᠰᠡᠨ ᠰᠦᠨᠢ ᠶᠢᠨ ᠪᠣᠯᠵᠤᠭᠠ ᠰᠢᠭ
ᠭᠠᠰᠢᠭᠤᠨ ᠮᠥᠷᠳᠡᠭᠡᠨ ᠰᠢᠭᠢᠷᠯᠢᠭ᠌᠃
ᠳᠤᠮᠳᠠᠴᠢ ᠨᠠᠮᠤᠷ ᠤᠨ ᠣᠯᠠᠷᠢᠯ ᠨᠢᠭᠡᠨᠲᠡ ᠭᠦᠷᠴᠤ ᠢᠷᠠᠪᠠ
ᠳᠤᠮᠳᠠ ᠴᠢᠮᠦᠭᠡ ᠪᠠᠷ ᠶᠢᠡᠨ ᠵᠢᠷᠭᠢᠭᠦ ᠴᠠᠭ ᠥᠩᠭᠡᠷᠡᠵᠤ ᠣᠤᠠᠪᠠ
ᠥᠯᠡᠳᠡᠭ᠍ᠰᠡᠨ ᠪᠦᠭᠦᠨ ᠮᠢᠨᠢ ᠠᠮᠳᠠᠳᠤ ᠰᠠᠷᠬᠤᠤᠨ ᠤᠨ ᠳᠠᠭᠤᠤ ᠳᠠᠳᠤᠢ
ᠥᠯᠢᠭᠡᠷ ᠨᠢ ᠢᠨᠠᠭ ᠳᠤᠷᠠᠯᠠᠯ ᠮᠠᠳᠤ ᠮᠤᠷᠤᠢ ᠰᠠᠷᠤᠢ ᠥᠷᠭᠦᠯᠵᠢᠯᠡᠨᠡ᠃
ᠪᠣᠳᠠᠨ ᠤ ᠨᠠᠮᠠᠭᠠ ᠰᠢᠷᠠᠯᠠᠵᠤ ᠡᠭᠢᠯᠡᠵᠡᠢ
ᠪᠣᠯᠵᠤᠮᠤᠷ ᠤᠨ ᠦᠳᠦ ᠴᠤ ᠰᠢᠩᠭᠡᠷᠡᠵᠤ ᠡᠭᠢᠯᠡᠵᠡᠢ
ᠮᠠᠷ ᠰᠠᠷ ᠬᠤᠩᠭ᠋ᠤᠷ ᠰᠠᠯᠭᠢᠨ ᠥᠯᠢᠶᠡᠭᠦᠶᠡ
ᠮᠥᠷᠦᠭᠡᠳᠦᠯ ᠤᠨ ᠳᠡᠷᠡᠭᠦ ᠪᠣᠯᠵᠤᠭᠠᠨ ᠤ ᠰᠦᠨᠢ ᠯᠠ
ᠮᠥᠩᠭᠡ ᠶᠢᠨ ᠬᠤᠷᠤᠮ ᠶᠢᠡᠷ ᠰᠠᠤᠠᠭᠢᠯ ᠳᠤ ᠵᠢᠩᠭᠢᠨᠠᠵᠤ ᠣᠶᠠᠩᠭ᠋ᠠᠷᠠᠨᠠ᠃
ᠵᠤᠬᠢᠶᠠᠭᠴᠢ᠄ ᠴ·ᠪᠠᠶᠠᠰᠤᠯ
ᠢᠷᠡᠯᠲᠡ᠄ ᠵᠤᠬᠢᠶᠠᠭᠴᠢ ᠡᠴᠡ ᠬᠠᠩᠭ᠋ᠠᠪᠠ
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 3404
ᠴᠠᠭ᠄ 2005 ᠤᠨ ᠤ 06 ᠰᠠᠷᠠ ᠶᠢᠨ 18
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ