☆ ᠯ·ᠣᠳᠤᠨ
ᠭᠡᠭᠡᠷᠡ ᠡᠴᠡ ᠳᠡᠭᠦᠭ᠍ᠰᠡᠨ ᠨᠠᠢ᠌ᠷᠠᠭ ᠤᠨ ᠴᠥᠷᠭᠦᠯᠡᠭᠡ
ᠭᠠᠵᠠᠷ ᠳᠠᠭᠠᠭᠠᠬᠤ ᠦᠭᠡᠶ ᠭᠤᠨᠢᠭ ᠪᠣᠳᠠᠷᠭᠠᠵᠤ ᠨᠠᠪᠴᠢᠰ ᠭᠡᠢ᠌ᠰᠦᠨᠡ
ᠭᠠᠩᠳᠠᠭᠰᠠᠨ ᠪᠠᠶᠠ ᠪᠠᠨ ᠳᠠᠯᠳᠠᠯᠠᠵᠤ ᠴᠢᠳᠠᠬᠤ ᠦᠭᠡᠶ ᠮᠤᠳᠤᠳ ᠨᠢᠴᠦᠭᠦᠷᠡᠨᠡ
ᠭᠠᠯᠵᠠᠭᠤ ᠰᠠᠯᠭᠢ ᠭᠦᠴᠤ ᠠᠪᠤᠨ ᠰᠠᠨᠠᠭᠠ ᠪᠠᠷ ᠶᠢᠡᠨ ᠭᠦᠭᠡᠷᠭᠡᠳᠡᠨᠡ
ᠭᠠᠩᠭ᠋ᠠᠩ ᠪᠠᠢ᠌ᠭᠠᠯᠢ ᠭᠡᠨᠡᠳᠲᠡ ᠬᠤᠪᠬᠠᠢ᠌ᠷᠠᠵᠤ ᠰᠡᠳᠭᠢᠯ ᠶᠢᠡᠷ ᠣᠨᠠᠨᠠ
ᠬᠤᠯᠠᠳᠠᠬᠤ ᠡᠴᠡ ᠪᠠᠨ ᠵᠠᠯᠬᠠᠭᠤᠷᠠᠵᠤ ᠬᠤᠳᠠ ᠶᠢᠨ ᠠᠭᠠᠷ ᠲᠤ ᠣᠳᠤᠭᠠ ᠳᠤᠨᠤᠨᠠ
ᠬᠤᠵᠢᠭᠳᠠᠬᠤ ᠡᠴᠡ ᠪᠠᠨ ᠠᠶᠤᠵᠤ ᠬᠤᠯᠠ ᠶᠢᠨ ᠠᠭᠤᠯᠠᠰ ᠢ ᠮᠠᠨᠠᠨ ᠪᠦᠷᠭᠦᠨᠡ
ᠬᠤᠷᠸᠠ ᠶᠢᠨ ᠳᠤᠭᠤᠰᠤᠨ ᠳᠤ ᠳᠠᠷᠤᠭᠳᠠᠵᠤ ᠣᠳᠤᠳ ᠊ᠭ᠍ᠬᠢᠷᠳᠦᠨᠡ
ᠬᠤᠭ ᠨᠤᠪᠰᠢᠨ ᠳᠤ ᠪᠣᠭᠢᠷᠳᠤᠵᠤ ᠪᠦᠮᠪᠦᠷᠴᠡᠭ᠌ ᠢᠯᠵᠠᠷᠠᠨᠠ
ᠮᠦᠰᠤ ᠣᠰᠤ ᠪᠠᠨ ᠢᠳᠡᠭᠡᠵᠤ
ᠣᠰᠤ ᠮᠦᠰᠤ ᠪᠠᠨ ᠳᠤᠯᠢᠶᠠᠵᠤ ᠳᠤᠤᠷᠠ ᠡᠴᠡ ᠨᠢ ᠢᠳᠠᠨᠠ
ᠵᠦᠩᠳᠡᠭᠡᠨ ᠶᠠᠭᠠᠭᠢᠵᠤ ᠬᠠᠢ᠌ᠯᠤᠭᠰᠠᠨ ᠶᠢᠡᠨ ᠮᠡᠳᠡᠭᠦ ᠦᠭᠡᠶ ᠮᠦᠰᠤ ᠭᠠᠢ᠌ᠬᠠᠨᠠ
ᠵᠥᠭᠡᠯᠡᠨ ᠨᠢ ᠬᠠᠳᠠᠭᠤ ᠪᠠᠨ ᠢᠳᠡᠳᠡᠭ᠌ ᠶᠤᠰᠤ ᠭᠡᠪ ᠶᠢᠡᠷ ᠦᠷᠭᠦᠯᠵᠢᠯᠡᠨᠡ
ᠬᠠᠳᠠᠨ ᠤ ᠨᠦᠮᠦᠷᠢ ᠳᠤ ᠬᠠᠪᠣᠷ ᠦᠷᠭᠡᠯᠡᠵᠤ ᠡᠪᠦᠯ ᠥᠩᠭᠡᠷᠡᠭᠦ ᠶᠢ ᠭᠦᠯᠢᠶᠡᠨᠡ
ᠬᠠᠭᠵᠠᠷᠠᠭᠰᠠᠨ ᠴᠠᠰᠤᠨ ᠤ ᠳᠤᠤᠷᠠ ᠬᠠᠭᠳᠠ ᠠᠮᠢᠯᠠᠵᠤ ᠭᠡᠵᠢᠶᠡ ᠨᠢᠳᠦᠯᠡᠭᠦ ᠪᠠᠨ ᠪᠣᠳᠤᠨᠠ
ᠬᠠᠨᠢ ᠶᠢᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠳᠠᠭᠤᠯᠠᠭᠰᠠᠭᠠᠷ ᠭᠠᠯᠠᠭᠤᠳ ᠢᠷᠠᠨᠠ
ᠬᠠᠨ ᠬᠤᠷᠸᠠ ᠨᠣᠢ᠌ᠷ ᠡᠴᠡ ᠪᠠᠨ ᠰᠠᠷᠠᠵᠤ ᠬᠠᠠᠴᠤᠨ ᠳᠤ ᠨᠢᠭᠤᠭᠰᠠᠨ ᠭᠠᠷ ᠶᠢᠡᠨ ᠭᠠᠷᠭᠠᠨᠠ
ᠡᠯᠡᠰᠤ ᠪᠠᠢ᠌ᠭᠰᠠᠨ ᠶᠢᠡᠨ ᠰᠠᠨᠠᠵᠤ ᠡᠷᠭᠢ ᠦᠪᠡᠷ ᠶᠢᠡᠨ ᠨᠤᠷᠠᠨᠠ
ᠡᠯᠡᠭ᠌ ᠪᠠᠷᠢᠵᠤ ᠬᠤᠯᠤᠭᠠᠨᠠ ᠢᠷᠤᠭᠠᠷ ᠡᠴᠡ ᠨᠢ ᠭᠦᠡᠳᠡᠢ᠌ᠯᠡᠨᠡ
ᠡᠮᠳᠡᠷᠭᠡᠢ ᠵᠠᠶᠠᠭᠠ ᠪᠠᠶᠠ ᠳᠡᠭᠡᠨ ᠭᠤᠮᠤᠳᠠᠵᠤ ᠵᠢᠪᠠᠷ ᠲᠤ ᠢᠳᠡᠭ᠍ᠳᠡᠨᠡ
ᠡᠮᠵᠡᠭ᠌ ᠶᠢᠡᠨ ᠥᠵᠡᠭᠦ ᠦᠭᠡᠶ ᠥᠭᠡᠭᠦᠨ ᠨᠢᠳᠤ ᠳᠡᠭᠡᠭᠦᠷ ᠥᠩᠭᠡᠯᠵᠡᠨᠡ
ᠴᠡᠴᠡᠭ᠌ ᠤᠨ ᠰᠠᠢ᠌ᠬᠠᠨ ᠳᠤ ᠳᠤᠷᠠᠯᠠᠵᠤ ᠡᠷᠪᠭᠡᠢ ᠨᠢᠰᠴᠤ ᠪᠠᠭᠤᠨᠠ
ᠴᠡᠪᠠᠷᠭᠡᠨ ᠪᠠᠶᠠ ᠪᠠᠨ ᠭᠡᠭᠡᠵᠤ ᠴᠡᠴᠡᠭ᠌ ᠭᠡᠨᠡᠳᠲᠡ ᠵᠤᠯᠭᠠᠷᠠᠨᠠ
ᠴᠡᠯᠭᠡᠷᠡᠵᠤ ᠴᠢᠳᠠᠭᠰᠠᠨ ᠦᠭᠡᠶ ᠬᠠᠢ᠌ᠷᠠ ᠭᠢᠷᠡᠭᠤ ᠳᠤ ᠪᠣᠭᠤᠷᠤᠯᠳᠤᠨᠠ
ᠴᠡᠭᠡᠵᠢᠨ ᠳᠡᠭᠡᠨ ᠪᠠᠭᠳᠠᠬᠤ ᠦᠭᠡᠶ ᠪᠠᠷᠳᠠᠮ ᠰᠠᠨᠠᠭᠠ ᠭᠡᠭᠡᠷᠡ ᠬᠠᠳᠠᠨᠠ
ᠭᠠᠯ ᠤᠨ ᠢᠯᠴᠢᠨ ᠡᠴᠡ ᠦᠷᠭᠦᠵᠤ ᠭᠦᠢᠳᠡᠨ ᠭᠠᠳᠠᠨᠠ ᠬᠤᠨᠤᠨᠠ
ᠭᠠᠳᠠᠨᠠ ᠶᠢᠨ ᠭᠦᠢᠳᠡᠨ ᠡᠴᠡ ᠵᠢᠭᠤᠳᠠᠵᠤ ᠢᠯᠴᠢ ᠭᠦᠡᠵᠢᠯᠡ ᠳᠤ ᠰᠢᠷᠭᠤᠨᠠ
ᠭᠠᠴᠢᠭᠳᠠᠪᠠᠴᠤ ᠦᠷᠡᠭ᠍ᠳᠡᠭᠦ ᠦᠭᠡᠶ ᠳᠤᠳᠤᠷ ᠳᠠᠮᠢᠷ ᠬᠠᠯᠠ ᠳᠠᠭᠠᠭᠠᠨᠠ
ᠭᠠᠷ ᠮᠤᠬᠤᠷᠳᠠᠬᠤ ᠳᠠᠭᠠᠨ ᠨᠦᠮᠦᠷᠢ ᠡᠷᠢᠳᠡᠭ᠌ ᠦᠯᠦᠨ ᠰᠢᠨᠤᠯ ᠨᠢᠭᠤᠷ ᠪᠠᠷᠠᠨᠠ
2009 ᠣᠨ ᠤ 10 ᠰᠠᠷᠠ ᠶᠢᠨ 17-18 ᠳᠤ ᠪᠢᠴᠢᠪᠠ
ᠬᠠᠶᠢᠭ᠄ ᠬᠦᠬᠡᠨᠠᠭᠤᠷ ᠮᠤᠵᠢ ᠶᠢᠨ ᠣᠯᠠᠭᠠᠨ ᠰᠢᠶᠠᠨ ᠤ ᠮᠤᠩᠭ᠋ᠤᠯ ᠪᠦᠷᠢᠨ ᠪᠠᠭᠠ ᠰᠤᠷᠭᠠᠭᠤᠯᠢ
ᠵᠤᠬᠢᠶᠠᠭᠴᠢ᠄ ᠯ·ᠣᠳᠤᠨ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 2630
ᠴᠠᠭ᠄ 2010 ᠤᠨ ᠤ 03 ᠰᠠᠷᠠ ᠶᠢᠨ 21
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ