☆ ᠪᠣᠤ ᠵᠢᠨᠵᠤᠸᠠᠨᠭᠽᠢ
ᠪᠠᠭᠰᠢ ᠬᠦᠮᠦᠨ
ᠪᠠᠭᠰᠢ ᠬᠦᠮᠦᠨ ︱
ᠣᠶᠣᠨ ᠣᠬᠠᠭᠠᠨ ᠤ ᠮᠢᠨᠢ ᠱᠣᠭᠣᠨ ᠪᠦᠲᠦᠭᠡᠭᠴᠢ ᠪᠣᠯᠤᠭᠰᠠᠨ
ᠣᠣᠷ ᠴᠢᠨᠠᠷ ᠤᠨ ᠮᠢᠨᠢ ᠬᠦᠮᠦᠵᠢᠭᠦᠯᠦᠭᠴᠢ ᠪᠣᠢᠵᠢᠭᠣᠯᠣᠭᠴᠢ ᠪᠣᠯᠤᠭᠰᠠᠨ
ᠣᠷᠴᠢᠯᠠᠩ ᠲᠡᠯᠡᠬᠡᠢ ᠶᠢ ᠮᠢᠨᠢ ᠭᠡᠢᠭᠦᠯᠦᠭᠴᠢ ᠣᠳᠤᠨ ᠬᠦᠮᠦᠨ
ᠣᠯᠠᠨ ᠲᠦᠮᠡᠨ ᠢ ᠮᠢᠨᠢ ᠭᠡᠷᠡᠯᠳᠦᠭᠦᠯᠦᠭᠴᠢ ᠰᠣᠳᠤᠨ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠣᠶᠣᠨ ᠤ ᠲᠦᠯᠬᠢᠭᠦᠷ ᠦᠨ ᠠᠳᠬᠣᠭᠣᠯᠤᠭᠴᠢ ᠪᠣᠯᠤᠭᠰᠠᠨ
ᠪᠢᠯᠢᠭ᠌ ᠦᠨ ᠭᠡᠭᠡᠪᠴᠢ ᠶᠢᠨ ᠰᠡᠩᠭᠡᠷᠡᠭᠦᠯᠦᠭᠴᠢ ᠪᠣᠯᠤᠭᠰᠠᠨ
ᠡᠨᠡ ᠨᠠᠰᠣᠨ ᠤ ᠮᠢᠨᠢ ᠠᠴᠢᠲᠣ ᠬᠦᠮᠦᠨ
ᠡᠷᠭᠢᠭᠦ ᠲᠦᠷᠦᠯ ᠦᠨ ᠮᠢᠨᠢ ᠭᠠᠪᠢᠶᠠᠲᠦ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠰᠣᠷᠬᠣᠢ ᠶᠢᠨ ᠲᠦᠯᠦᠭᠡ ᠴᠢᠷᠮᠠᠢᠵᠣ ᠶᠠᠪᠤᠭᠰᠠᠨ
ᠰᠣᠷᠭᠠᠬᠣᠢ ᠶᠢᠨ ᠲᠦᠯᠦᠭᠡ ᠵᠢᠳᠭᠦᠵᠦ ᠶᠠᠪᠤᠭᠰᠠᠨ
ᠰᠦᠰᠦ ᠵᠣᠷᠢᠭ ᠲᠠᠢ ᠰᠣᠳᠣᠯᠣᠭᠴᠢ ᠬᠦᠮᠦᠨ
ᠰᠦᠷ ᠬᠦᠴᠦᠨ ᠲᠠᠢ ᠰᠣᠷᠭᠠᠭᠴᠢ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠢᠷᠡᠭᠡᠳᠦᠢ ᠬᠦᠰᠡᠯ ᠢ ᠮᠢᠨᠢ ᠰᠠᠷᠠᠭᠣᠯᠵᠢᠭᠣᠯᠣᠭᠰᠠᠨ
ᠢᠷᠡᠬᠦ ᠮᠠᠷᠭᠠᠰᠢ ᠶᠢ ᠮᠢᠨᠢ ᠭᠡᠭᠡᠷᠡᠭᠦᠯᠦᠭᠰᠡᠨ
ᠡᠨᠡ ᠪᠡᠶᠡ ᠶᠢᠨ ᠮᠢᠨᠢ ᠢᠲᠡᠭᠡᠯ ᠲᠠᠢ ᠬᠦᠮᠦᠨ
ᠠᠷᠠᠳ ᠣᠯᠠᠨ ᠤ ᠮᠢᠨᠢ ᠪᠢᠰᠢᠷᠡᠯ ᠲᠠᠢ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠦᠷᠦᠰᠢᠶᠡᠩᠭᠦᠢ ᠰᠡᠳᠭᠢᠯᠭᠡ ᠪᠡᠷ ᠢᠶᠡᠨ ᠬᠡᠣᠬᠡᠳ ᠢᠶᠡᠨ ᠪᠣᠢᠵᠢᠭᠣᠯᠣᠭᠰᠠᠨ
ᠦᠭᠭᠢᠶᠡᠮᠦᠷᠢᠴᠢ ᠣᠶᠣᠨ ᠢᠶᠠᠷ ᠢᠶᠠᠨ ᠰᠣᠷᠣᠭᠴᠢᠳ ᠢᠶᠠᠨ ᠬᠦᠮᠦᠵᠢᠭᠦᠯᠦᠭᠰᠡᠨ
ᠦᠷᠡ ᠬᠡᠣᠬᠡᠳ ᠲᠦ ᠪᠡᠨ ᠬᠠᠢᠷᠠᠯᠠᠯ ᠲᠠᠢ ᠬᠦᠮᠦᠨ
ᠦᠰᠪᠦᠷᠢ ᠶᠢᠨ ᠰᠣᠷᠣᠭᠴᠢᠳ ᠲᠤ ᠪᠠᠨ ᠬᠦᠨᠳᠦᠳᠭᠡᠯ ᠲᠠᠢ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠪᠣᠰᠤᠳ ᠤᠨ ᠲᠦᠯᠦᠭᠡ ᠪᠡᠶᠡ ᠪᠡᠨ ᠦᠷᠡᠬᠦ ᠡᠴᠡ ᠠᠶᠣᠳᠠᠭ ᠦᠭᠡᠢ
ᠪᠣᠯᠪᠠᠰᠣᠨ ᠤ ᠲᠦᠯᠦᠭᠡ ᠠᠯᠢᠪᠠ ᠪᠠᠨ ᠵᠣᠷᠢᠭᠣᠯᠬᠤ ᠠᠴᠠ ᠵᠢᠷᠦᠭᠡᠰᠢᠶᠡᠳᠡᠭ ᠦᠭᠡᠢ
ᠪᠦᠮᠪᠦᠷᠴᠡᠭ ᠲᠡᠯᠡᠬᠡᠢ ᠶᠢᠨ ᠰᠡᠴᠡᠨ ᠪᠠᠭᠠᠲᠣᠷ ᠬᠦᠮᠦᠨ
ᠪᠦᠭᠦᠳᠡ ᠣᠯᠠᠨ ᠤ ᠮᠢᠨᠢ ᠰᠡᠷᠭᠦᠯᠡᠩ ᠵᠠᠩᠵᠣᠨ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠰᠠᠭᠣᠭᠰᠠᠨ ᠰᠠᠢᠬᠠᠨ ᠭᠠᠵᠠᠷ ᠲᠤ ᠪᠠᠨ
ᠰᠣᠶᠣᠯ ᠤᠨ ᠦᠷᠡ ᠶᠢ ᠰᠠᠴᠣᠭᠴᠢ ᠠᠵᠢᠯᠴᠢ ᠬᠦᠮᠦᠨ
ᠣᠨᠠᠭᠰᠠᠨ ᠭᠣᠶᠣᠬᠠᠨ ᠨᠣᠲᠣᠭ ᠲᠤ ᠪᠠᠨ
ᠣᠶᠣᠳᠠᠨ ᠰᠡᠭᠡᠭᠡᠳᠡᠨ ᠢ ᠬᠦᠮᠦᠵᠢᠭᠦᠯᠦᠭᠴᠢ ᠬᠦᠳᠡᠯᠮᠦᠷᠢᠴᠢ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠬᠦᠷᠦᠰᠦᠲᠦ ᠲᠡᠯᠡᠬᠡᠢ ᠳᠦ ᠬᠦᠮᠦᠨ ᠪᠣᠯᠬᠤ ᠶᠢᠨ
ᠬᠦᠯᠦᠭ ᠦᠨ ᠵᠢᠯᠣᠭᠣ ᠶᠢ ᠠᠳᠬᠣᠭᠣᠯᠤᠭᠰᠠᠨ ᠪᠣᠷᠬᠠᠨ ᠬᠦᠮᠦᠨ
ᠰᠠᠨᠰᠠᠷ ᠶᠢᠷᠳᠢᠨᠴᠣ ᠪᠠᠷ ᠠᠶᠠᠯᠠᠨ ᠵᠣᠭᠠᠴᠠᠬᠣ ᠶᠢᠨ
ᠨᠢᠰᠭᠡᠯ ᠦᠨ ᠡᠷᠴᠢᠯᠡᠭᠦᠷ ᠢ ᠪᠠᠷᠢᠭᠣᠯᠤᠭᠰᠠᠨ ᠪᠣᠭᠳᠠ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠠᠮᠢᠳᠣᠷᠠᠬᠣᠢ ᠶᠢᠨ ᠵᠦᠭᠯᠡᠭᠦᠷ ᠢ ᠵᠦᠪ ᠵᠢᠭᠠᠭᠰᠠᠨ
ᠦᠷᠭᠡᠨ ᠮᠡᠳᠡᠯᠭᠡ ᠭᠦᠨ ᠣᠬᠠᠭᠠᠨ ᠲᠠᠢ ᠡᠷᠳᠡᠮᠲᠡᠨ ᠬᠦᠮᠦᠨ
ᠣᠷᠣᠰᠢᠬᠣᠢ ᠶᠢᠨ ᠴᠢᠭᠯᠡᠭᠦᠷ ᠢ ᠣᠨᠣᠪᠴᠢᠲᠠᠢ ᠲᠣᠰᠢᠶᠠᠭᠰᠠᠨ
ᠦᠯᠡᠮᠵᠢ ᠲᠣᠷᠰᠢᠯᠭᠠ ᠣᠷᠠ ᠠᠪᠢᠶᠠᠰ ᠲᠠᠢ ᠴᠢᠳᠠᠪᠦᠷᠢᠳᠠᠨ ᠬᠦᠮᠦᠨ︕
ᠪᠠᠭᠰᠢ ᠬᠦᠮᠦᠨ ︱
ᠡᠷᠳᠡᠮ ᠦᠨ ᠲᠠᠯᠠᠢ ᠪᠠᠷ ᠱᠣᠩᠪᠠᠭᠰᠠᠨ
ᠮᠡᠳᠡᠯᠭᠡ ᠶᠢᠨ ᠶᠢᠷᠳᠢᠨᠴᠣ ᠪᠠᠷ ᠲᠡᠨᠦᠭᠰᠡᠨ
ᠬᠣᠪᠢᠯᠭᠠᠨ ᠡᠷᠳᠡᠮ ᠲᠠᠶ ᠮᠡᠷᠭᠡᠨ ᠬᠦᠮᠦᠨ
ᠬᠣᠯᠠ ᠶᠢᠨ ᠪᠣᠳᠤᠯᠭᠠ ᠲᠠᠶ ᠭᠡᠭᠡᠨ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠬᠠᠷᠠᠩᠭᠣᠢ ᠶᠢ ᠭᠡᠢᠭᠦᠯᠦᠭᠴᠢ ᠵᠣᠯᠠ ᠪᠣᠯᠤᠭᠰᠠᠨ
ᠬᠠᠮᠤᠭ ᠢ ᠭᠡᠷᠡᠯᠳᠦᠭᠦᠯᠦᠭᠴᠢ ᠯᠠ ᠪᠣᠯᠤᠭᠰᠠᠨ
ᠮᠡᠳᠡᠯᠭᠡ ᠡᠷᠳᠡᠮ ᠢᠶᠡᠷ ᠪᠠᠶᠠᠯᠢᠭ ᠬᠦᠮᠦᠨ
ᠮᠣᠷᠠᠯ ᠰᠣᠷᠳᠠᠯ ᠢᠶᠠᠷ ᠴᠢᠭ᠍ᠴᠢ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠦᠷᠡ ᠪᠡᠨ ᠭᠡᠪᠡᠯ ᠦᠷᠦ ᠵᠢᠷᠦᠬᠡᠨ ᠡᠴᠡ ᠪᠡᠨ ᠪᠦᠪᠡᠢᠯᠡᠭᠰᠡᠨ
ᠰᠣᠷᠤᠭᠴᠢ ᠪᠠᠨ ᠭᠡᠪᠡᠯ ᠰᠡᠳᠭᠢᠯ ᠦᠨ ᠣᠭ ᠠᠴᠠ ᠪᠠᠨ ᠬᠠᠢᠷᠠᠯᠠᠭᠰᠠᠨ
ᠠᠨᠠᠪᠠᠳ ᠲᠠᠯᠠᠢ ᠠᠴᠠ ᠴᠤ ᠭᠦᠨ ᠠᠴᠢ ᠭᠠᠪᠢᠶᠠ ᠲᠠᠢ ᠡᠴᠢᠭᠡ ᠬᠦᠮᠦᠨ
ᠰᠦᠮᠪᠦᠷ ᠠᠭᠣᠯᠠ ᠠᠴᠠ ᠴᠤ ᠦᠨᠳᠦᠷ ᠦᠷᠦᠰᠢᠶᠡᠯ ᠬᠠᠢᠷᠠ ᠲᠠᠢ ᠡᠵᠢ ᠬᠦᠮᠦᠨ ︕
ᠪᠠᠭᠰᠢ ᠬᠦᠮᠦᠨ ︱
ᠡᠴᠢᠭᠡ ᠡᠬᠡ ᠨᠢ ᠦᠷᠡ ᠶᠢᠨ ᠢᠶᠡᠨ ᠲᠦᠯᠦᠭᠡ
ᠦᠰᠦ ᠴᠠᠢᠵᠣ ᠰᠢᠳᠦ ᠣᠨᠠᠨᠠ ᠭᠡᠬᠦᠯᠡᠷ
ᠪᠠᠭᠰᠢ ᠬᠦᠮᠦᠨ ᠰᠣᠷᠤᠭᠴᠢ ᠶᠢᠨ ᠢᠶᠡᠨ ᠲᠦᠯᠦᠭᠡ
ᠶᠠᠰᠤ ᠴᠠᠢᠵᠣ ᠴᠢᠮᠦᠭᠡ ᠲᠣᠨᠳᠠᠷᠠᠨᠠ ᠡ ᠁
ᠬᠠᠶᠠᠭ᠄ ᠬᠢᠩᠭᠠᠨ ᠠᠢᠮᠠᠭ ᠵᠠᠯᠠᠢᠳ ᠬᠤᠰᠢᠭᠣ
ᠵᠤᠬᠢᠶᠠᠭᠴᠢ᠄ ᠪᠣᠤ ᠵᠢᠨᠵᠤᠸᠠᠨᠭᠽᠢ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 10997
ᠴᠠᠭ᠄ 2023 ᠤᠨ ᠤ 03 ᠰᠠᠷᠠ ᠶᠢᠨ 31
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ