☆ ᠥᠭᠡᠯᠡᠳ·ᠣ·ᠪᠠᠭᠠᠳᠤᠷ
ᠴᠠᠰᠤ ᠡᠴᠠ ᠳᠡᠭᠦᠭ᠍ᠰᠡᠨ ᠪᠣᠳᠤᠯ
ᠴᠠᠰᠤ ᠪᠣᠯ ᠬᠠᠢ᠌ᠷᠠ
ᠦᠷᠡ ᠶᠢᠨ ᠲᠦᠯᠦᠭᠡ ᠣᠶᠠᠰᠠᠭᠰᠠᠨ
ᠡᠵᠢ ᠵᠢᠨ ᠨᠢᠯᠪᠣᠰᠤ
ᠨᠤᠳᠤᠭ ᠤᠨ ᠲᠦᠯᠦᠭᠡ ᠵᠢᠳᠭᠦᠭ᠍ᠰᠡᠨ
ᠠᠪᠣ ᠶᠢᠨ ᠰᠡᠳᠬᠢᠯ
ᠴᠠᠰᠤ ᠪᠣᠯ ᠰᠢᠯᠦᠭ᠌
ᠣᠩᠭ᠋ᠤᠨ ᠰᠠᠷᠠᠯ ᠡᠴᠡ ᠣᠠᠳᠤᠷᠠᠭᠰᠠᠨ
ᠵᠢᠷᠦᠭᠡᠨ ᠤ ᠴᠤᠭᠢᠯᠭᠠ
ᠡᠵᠡᠨ ᠳᠡᠭ᠍ᠷᠢ ᠡᠴᠡ ᠦᠷᠤᠰᠢᠶᠠᠭᠰᠠᠨ
ᠪᠣᠳᠤᠯ ᠤᠨ ᠮᠥᠭᠦᠯᠢᠭ᠌ ᠡ
ᠴᠠᠰᠤ ᠪᠣᠯ ᠴᠢᠨᠠᠷ
ᠦᠷᠤ ᠵᠥᠭᠡᠯᠡᠨ ᠰᠡᠳᠬᠢᠯ ᠳᠠᠢ
ᠦᠨᠡᠠᠴᠢ ᠮᠤᠩᠭ᠋ᠤᠯ ᠵᠠᠩ
ᠴᠠᠰᠤ ᠪᠣᠯ ᠬᠠᠳᠠᠭ
ᠡᠭᠡ ᠳᠡᠯᠡᠭᠡᠢ ᠳᠡᠭᠡᠨ ᠡᠷᠭᠦᠭ᠍ᠰᠡᠨ
ᠡᠨᠡᠷᠢᠯ ᠬᠠᠢ᠌ᠷᠠ ᠶᠢᠨ ᠪᠦᠷᠢᠯᠸᠡ
ᠴᠠᠰᠤ ᠪᠣᠯ ᠠᠢ᠌ᠷᠠᠭ
ᠴᠠᠭᠠᠨ ᠢᠳᠡᠭᠡᠨ ᠤ ᠳᠡᠭᠡᠵᠢ
ᠡᠷᠡᠭᠦᠯ ᠡᠩᠬᠡ ᠶᠢᠨ ᠷᠠᠰᠢᠶᠠᠨ
ᠴᠠᠰᠤ ᠪᠣᠯ ᠣᠰᠤ
ᠠᠮᠢᠨ ᠬᠠᠢ᠌ᠷᠠ ᠶᠢᠨ ᠰᠢᠳᠦᠭᠡᠨ
ᠠᠮᠢᠵᠢᠷᠠᠯ ᠤᠨ ᠨᠤᠭᠤᠭᠠᠨ ᠵᠡᠭᠦᠳᠤ ᠡ
ᠴᠠᠰᠤ ᠪᠣᠯ ᠵᠠᠮ
ᠠᠮᠢᠳᠤᠷᠠᠯ ᠤᠨ ᠨᠤᠭᠤᠭᠠᠨ ᠬᠠᠷᠭᠤᠢ
ᠠᠯᠤᠰ ᠢ ᠵᠤᠷᠢᠭᠰᠠᠨ ᠭᠦᠰᠡᠯ
ᠴᠠᠰᠤ ᠪᠣᠯ ᠭᠠᠯ
ᠴᠠᠭ ᠡᠷᠡᠨ ᠤ ᠳᠠᠭᠤᠯᠠᠯ
ᠴᠠᠢ᠌ᠯᠭᠠᠨ ᠰᠠᠨᠠᠭᠠᠨ ᠤ ᠰᠢᠳᠦᠭᠡᠨ
ᠴᠠᠰᠤ ᠪᠣᠯ ᠰᠠᠷᠠᠮᠵᠢ
ᠪᠣᠷᠤᠭᠤ ᠭᠡᠷᠡᠭ᠌ ᠤᠨ ᠬᠤᠩᠬᠤ
ᠪᠦᠳᠦᠷᠦᠭ᠍ᠰᠡᠨ ᠵᠠᠮ ᠤᠨ ᠳᠤᠭᠢᠶᠠ
ᠴᠠᠰᠤ ᠪᠣᠯ ᠬᠤᠴᠢᠯᠭᠠ
ᠠᠮᠢᠯᠠᠯ ᠤᠨ ᠳᠤᠯᠠᠭᠠᠨ ᠭᠦᠡᠵᠢᠯᠡ
ᠣᠷᠭᠤᠮᠠᠯ ᠤᠨ ᠠᠮᠢᠨ ᠰᠠᠭᠢᠶᠠ ᠡ
ᠴᠠᠰᠤ ᠪᠣᠯ ᠡᠷᠡ ᠴᠡᠷᠢᠭ᠌
ᠡᠭᠡ ᠤᠷᠤᠨ ᠭᠡᠳᠡᠭ᠌ ᠭᠠᠭᠴᠠᠬᠠᠨ ᠰᠡᠳᠭᠢᠯ
ᠦᠪᠡᠷ ᠢ ᠪᠠᠨ ᠦᠷᠡᠭ᠍ᠳᠡᠭᠦᠯᠳᠡᠭ᠌ ᠬᠠᠳᠠᠭᠤ ᠰᠦᠰᠦ
ᠴᠠᠰᠤ ᠪᠣᠯ ᠪᠣᠷᠬᠠᠨ ᠭᠡᠰᠢᠭ᠌
ᠬᠠᠨ ᠳᠡᠯᠡᠭᠡᠢ ᠶᠢᠨ ᠬᠠᠢ᠌ᠷᠠ ᠶᠢᠨ ᠰᠠᠴᠤᠯᠢ
ᠬᠠᠮᠤᠭ ᠠᠮᠢᠳᠠᠨ ᠤ ᠮᠥᠩᠭᠡ ᠭᠦᠰᠡᠯ
ᠴᠠᠰᠤ ᠪᠣᠯ ᠡᠩᠬᠡ ᠶᠢᠨ ᠪᠠᠯᠭᠡᠳᠡᠯ
ᠳᠠᠢ᠌ᠪᠣᠩ ᠳᠡᠯᠡᠭᠡᠢ ᠶᠢᠨ ᠦᠯᠵᠡᠢ ᠳᠠᠮᠪᠠᠷᠢᠯ
ᠳᠡᠭ᠍ᠷᠢ ᠭᠠᠵᠠᠷ ᠤᠨ ᠡᠩᠬᠡ ᠵᠠᠶᠠᠭᠠ
ᠴᠠᠰᠤ ᠭᠡᠳᠡᠭ᠌ ᠴᠢᠨᠢ
ᠬᠤᠷᠮᠤᠰᠠᠳᠠᠨ ᠳᠡᠭ᠍ᠷᠢ ᠡᠴᠡ
ᠬᠤᠷᠸᠠ ᠳᠤ ᠢᠯᠡᠭᠡᠭ᠍ᠰᠡᠨ
ᠥᠭᠡᠳᠡᠯᠡᠭᠦ ᠠᠮᠢᠳᠤᠷᠠᠯ ᠤᠨ
ᠦᠯᠵᠡᠢ ᠭᠡᠰᠢᠭ᠌ ᠬᠤᠷᠣᠢ᠌ᠯᠠᠭᠰᠠᠨ
ᠡᠪᠦᠭᠡᠳ ᠤᠨ ᠳᠠᠮᠪᠠᠷᠠᠯ ᠲᠡᠶ ᠵᠦᠩᠨᠠᠯ
ᠬᠠᠨᠠᠭᠠᠷ ᠠᠭᠤᠳᠠᠮ ᠳᠠᠯᠠ ᠨᠤᠳᠤᠭ ᠳᠤ
ᠬᠠᠯᠠᠭᠤᠨ ᠬᠠᠢ᠌ᠷᠠ ᠪᠠᠨ ᠢᠪᠠᠭᠡᠭ᠍ᠰᠡᠨ
ᠬᠠᠪᠣᠷ ᠤᠨ ᠨᠤᠭᠤᠭᠠᠨ ᠳᠠᠭᠤᠯᠠᠯ ᠳᠠᠢ
ᠬᠠᠨ ᠭᠠᠵᠠᠷ ᠤᠨ ᠠᠷᠢᠭᠤᠨ ᠰᠢᠮᠠ
ᠬᠠᠢ᠌ᠷᠠ ᠪᠠᠷ ᠣᠶᠠᠰᠠᠭᠰᠠᠨ
ᠬᠠᠭᠢᠷ ᠡᠪᠦᠯ ᠤᠨ
ᠭᠦᠰᠡᠯ ᠳᠠᠭᠡᠨ ᠣᠨᠠᠭᠠᠭᠰᠠᠨ
ᠬᠠᠯᠠᠭᠤᠨ ᠨᠢᠯᠪᠣᠰᠤ
ᠬᠤᠩᠭ᠋ᠤᠷ ᠨᠠᠢ᠌ᠵᠢ ᠪᠠᠨ
ᠳᠤᠷᠠᠰᠤᠨ ᠮᠦᠷᠦᠭᠡᠳᠭᠦ ᠳᠤ ᠪᠠᠨ
ᠳᠤᠷᠠᠯᠠᠯ ᠬᠠᠢ᠌ᠷᠠ ᠪᠠᠨ
ᠬᠠᠶᠢᠭᠯᠠᠨ ᠪᠢᠴᠢᠭ᠍ᠰᠡᠨ ᠵᠠᠭᠢᠶᠠ
ᠰᠥ᠋ ᠰᠢᠭ᠌ ᠠᠷᠢᠭᠤᠨ ᠰᠠᠨᠠᠭᠠ ᠪᠠᠨ
ᠵᠣᠢ᠌ᠷᠯᠠᠨ ᠠᠳᠠᠯᠢᠳᠬᠠᠭᠰᠠᠨ
ᠰᠤᠳᠤᠨ ᠪᠠᠢ᠌ᠭᠠᠯᠢ ᠵᠢᠨ
ᠵᠢᠷᠭᠠᠯ ᠳᠡᠯᠯᠡᠭᠰᠡᠨ ᠭᠡᠢ᠌ᠮᠦᠷᠢ ᠡ
ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶᠢᠭ ᠄ ᠰᠢᠠᠵᠢᠶᠠᠩ᠂ ᠪᠣᠷᠤᠳᠠᠯᠠ
ᠵᠤᠬᠢᠶᠠᠭᠴᠢ᠄ ᠥᠭᠡᠯᠡᠳ·ᠣ·ᠪᠠᠭᠠᠳᠤᠷ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 2641
ᠴᠠᠭ᠄ 2012 ᠤᠨ ᠤ 02 ᠰᠠᠷᠠ ᠶᠢᠨ 14
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ