☆ ᠳ·ᠭᠦᠭᠡᠮᠦ᠋ᠷᠡᠨ
ᠬᠠᠨᠠᠰ ᠤᠨ ᠳᠡᠭ᠍ᠷᠢ ᠳᠤ ᠵᠠᠯᠪᠢᠷᠠᠨᠠᠮ
ᠬᠠᠨᠠᠰ ᠤᠨ ᠳᠡᠭ᠍ᠷᠢ ᠳᠤ ᠵᠠᠯᠪᠢᠷᠠᠨᠠᠮ ︕
ᠴᠡᠩᠭᠡᠭ᠌ ᠣᠰᠤᠨ ᠡᠴᠡ ᠴᠡᠯᠮᠡᠭ᠌ ᠳᠡᠭ᠍ᠷᠢ ᠳᠤᠯᠳᠠᠯᠠ ᠪᠢᠳᠠᠨ ᠤ ᠣᠳᠤ ᠶᠢᠨ ᠨᠢᠳᠤᠨ ᠳᠤ ᠥᠵᠡᠭ᠍ᠳᠡᠵᠤ ᠪᠠᠢ᠌ᠭᠠ ᠶᠠᠭᠤ ᠪᠦᠭᠦᠨ ᠴᠦᠮ ᠴᠤᠭᠳᠠᠢ ᠰᠦᠯᠳᠡᠳᠡᠢ ᠠᠮᠢᠳᠠᠢ ᠭᠤᠤᠯᠳᠠᠢ ᠳᠡᠷᠡᠭᠦ ᠪᠠᠢ᠌ᠭᠠᠯᠢᠯᠢᠭ ᠳᠦᠷᠰᠤ ᠪᠠᠷ ᠶᠢᠡᠨ ᠪᠠᠢ᠌ᠭᠠ ᠳᠤ ᠪᠢ ᠦᠨᠡᠨ ᠪᠠᠬᠠᠷᠬᠠᠨᠠᠮ ︕ ᠰᠥᠰᠦᠭ᠌ ᠪᠢᠰᠢᠷᠠᠯ ᠣᠯᠠᠮ ᠨᠡᠮᠡᠭ᠍ᠳᠡᠨᠡᠮ ︕ ᠨᠢᠳᠤᠨ ᠳᠤ ᠥᠵᠡᠭ᠍ᠳᠡᠮᠡ ᠳᠠᠷᠠ ᠣᠯᠠᠨ ᠵᠢᠷᠭᠠᠬᠠᠢ᠂ ᠨᠠᠭᠤᠷ ᠤᠨ ᠳᠤᠮᠳᠠ ᠱᠤᠩᠪᠠᠯᠳᠠᠬᠤ ᠳᠠᠷᠠ ᠣᠯᠠᠨ ᠰᠢᠪᠠᠭᠤᠬᠠᠢ᠂ ᠨᠠᠳᠠ ᠶᠢ ᠲᠠᠭᠠᠨ ᠡᠷᠭᠢᠯᠳᠦᠭᠦ ᠳᠠᠷᠠ ᠣᠯᠠᠨ ᠡᠷᠪᠠᠭᠡᠢ᠂ ᠨᠠᠷᠠᠰᠤᠨ ᠮᠤᠳᠤᠳ ᠢ ᠲ᠋ᠠᠭᠠᠨ ᠨᠠᠭᠠᠳᠤᠯᠴᠠᠬᠤ ᠳᠠᠷᠠ ᠣᠯᠠᠨ ᠭᠡᠷᠡᠮᠤ ᠤᠳ᠂ ᠠᠢ ︕ ᠭᠦᠮᠤᠨ ᠠᠮᠢᠳᠠᠨ ᠨᠢᠭᠡᠳᠦᠭ᠍ᠰᠡᠨ ᠪᠠᠯᠠᠷ ᠪᠠᠢ᠌ᠭᠠᠯᠢ ᠭᠡᠵᠤ ᠡᠢ᠌ᠮᠤ ᠯᠠ ᠪᠠᠢ᠌ᠬᠠ ︕ ᠬᠤᠪᠠᠬᠠᠢ ᠮᠤᠳᠤᠨ ᠳᠤ ᠰᠠᠭᠤᠭᠰᠠᠨ ᠳᠠᠰ ᠬᠠᠷᠠ ᠭᠡᠷᠢᠶᠡ ᠤᠳ᠂ ᠬᠠᠯᠬᠠᠳᠤ ᠠᠭᠤᠯᠠ ᠢ ᠳᠠᠮᠵᠢᠭᠰᠠᠨ ᠭᠦᠮᠤᠨ ᠬᠠᠷᠠ ᠭᠦᠷᠦᠭᠡᠰᠤ᠂ ᠰᠢᠷᠠ ᠬᠠᠳᠠᠨ ᠳᠤ ᠰᠠᠭᠤᠭᠰᠠᠨ ᠣᠯᠠᠢ᠌ᠷ ᠪᠦᠷᠭᠦᠤᠨ ᠱᠤᠩᠬᠤᠷ ᠤᠳ᠂ ᠪᠣᠷᠤᠪᠠᠳᠠᠢ ᠶᠢᠨ ᠡᠩᠭᠡᠷ ᠲᠤ ᠬᠤᠤᠰᠯᠠᠨ ᠣᠷᠭᠤᠭᠰᠠᠨ ᠴᠠᠭᠠᠨ ᠴᠠᠷᠠᠰᠤᠨ ᠤᠳ᠂ ᠠᠢ ︕ ᠰᠢᠯᠦᠭ᠌ ᠮᠡᠳᠡᠭᠦ ᠦᠭᠡᠶ ᠨᠠᠮᠠ ᠶᠢ ᠰᠢᠯᠦᠭᠯᠡᠭᠦ ᠳᠦᠷᠦᠭ᠍ᠳᠡᠯ ᠣᠷᠤᠭᠤᠯᠤᠭᠰᠠᠨ ᠬᠠᠨᠠᠰ ᠤᠨ ᠡᠨᠡ ᠳᠡᠭ᠍ᠷᠢ ᠲᠤ ᠠᠷᠭᠠ ᠦᠭᠡᠶ ᠪᠢ ᠵᠠᠯᠪᠢᠷᠠᠨᠠᠮ ︕ ᠭᠦᠭᠡ ᠮᠤᠠᠴᠤᠭ ᠤᠨ ᠮᠤᠳᠤᠨ ᠦᠷᠭᠦᠭᠡ᠂ ᠭᠦᠭᠡ ᠮᠤᠩᠭ᠋ᠤᠯ ᠤᠨ ᠮᠢᠨᠢ ᠣᠪᠣᠭᠠᠨ ᠰᠦᠯᠳᠡ᠂ ᠬᠠᠳᠠᠭ ᠰᠠᠮᠪᠠᠢ᠌ᠭᠰᠠᠨ ᠴᠢᠩᠭᠢᠰ ᠤᠨ ᠭᠦᠷᠦᠭ᠌᠂ ᠬᠠᠰᠠᠭ ᠬᠤᠯᠢᠯᠳᠤᠭᠰᠠᠨ ᠮᠤᠩᠭ᠋ᠤᠯ ᠥᠭᠡ ᠤᠳ᠂ ᠴᠢᠩᠭᠢᠰ ᠤᠨ ᠳᠤᠮᠤᠭ ᠶᠢᠡᠷ ᠭᠡᠯᠭᠢᠶᠡᠯᠳᠦᠭ᠍ᠰᠡᠨ ᠬᠠᠨᠠᠰ ᠨᠠᠭᠤᠷ ᠤᠨ ᠢᠷᠠᠯᠳᠠ ᠤᠳ᠂ ᠶᠸᠯᠢᠤᠢ ᠴᠦᠼᠠᠢ ᠪᠠᠷ ᠡᠰᠢᠯᠡᠭ᠍ᠰᠡᠨ ᠭᠢᠳᠠᠨ ᠮᠠᠶᠢᠭ ᠤᠨ ᠥᠯᠢᠭᠡᠷ ᠤᠳ᠂ ᠭᠡᠩᠭᠡᠢ ᠯᠠᠮᠠ ᠶᠢᠨ ᠣᠩᠰᠢᠯᠭᠠ ᠲᠡᠶ ᠬᠤᠷᠯᠤᠸᠠ ᠡᠷᠭᠢᠯᠭᠡᠨ ᠤ ᠳᠠᠭᠤᠨ ᠤᠳ᠂ ᠭᠡᠨᠡᠳᠲᠡ ᠣᠯᠵᠤ ᠥᠵᠡᠭ᠍ᠰᠡᠨ ᠪᠣᠰᠤᠭᠠ ᠮᠤᠩᠭ᠋ᠤᠯ ᠥᠰᠦᠭ᠌ ᠤᠳ᠂ ᠵᠢᠷᠦᠭᠡᠨ ᠴᠤᠭᠢᠯᠭᠠ ᠶᠢ ᠳᠦᠷᠭᠡᠳᠭᠡᠨ᠂ ᠵᠠᠯᠪᠢᠷᠠᠬᠤ ᠰᠥᠵᠢᠭ᠌ ᠢ ᠨᠡᠮᠡᠭ᠍ᠳᠡᠭᠦᠯᠦᠭ᠍ᠰᠡᠨ ᠬᠠᠨᠠᠰ ᠤᠨ ᠡᠨᠡ ᠳᠡᠭ᠍ᠷᠢ ᠳᠤ ᠠᠷᠭᠠ ᠦᠭᠡᠶ ᠪᠢ ᠵᠠᠯᠪᠢᠷᠠᠨᠠᠮ ︕
《ᠪᠣᠷᠬᠠᠨ ᠤ ᠨᠢᠳᠤ》 ᠭᠡᠵᠤ ᠴᠢᠩᠭᠢᠰ ᠤᠨ ᠠᠮᠠ ᠪᠠᠷ ᠡᠷᠭᠦᠮᠵᠢᠯᠡᠭ᠍ᠳᠡᠭ᠍ᠰᠡᠨ ᠬᠠᠭᠠᠨ ᠣᠰᠤ᠂ 《ᠯᠤᠤ ᠶᠢᠨ ᠨᠢᠳᠤ》 ᠭᠡᠵᠤ ᠠᠷᠠᠤᠨ ᠤᠨ ᠠᠮᠠ ᠪᠠᠷ ᠣᠯᠠᠮᠵᠢᠯᠠᠭᠳᠠᠭᠰᠠᠨ ᠷᠠᠰᠢᠶᠠᠨ ᠪᠣᠯᠠᠭ᠂ 《ᠬᠠᠪᠢᠷᠭᠠᠨ ᠰᠠᠷᠠ》 ᠭᠡᠵᠤ ᠳᠡᠯᠡᠭᠡᠢ ᠳᠤ ᠠᠯᠳᠠᠷᠰᠢᠭᠰᠠᠨ ᠬᠠᠨᠠᠰ ᠨᠠᠭᠤᠷ ᠤᠨ ᠮᠤᠷᠤᠢ᠂ ᠬᠤᠶᠠᠷ ᠳᠢᠪ ᠢ ᠰᠥᠡᠳᠡᠷᠯᠡᠭ᠍ᠰᠡᠨ ᠰᠢᠪᠧᠷᠢᠶᠠ ᠶᠢᠨ ᠮᠢᠩᠭ᠋ᠠᠨ ᠨᠠᠰᠤᠳᠤ ᠨᠠᠷᠠᠰᠤ ᠤᠳ᠂ ᠠᠢ ︕ ᠬᠠᠮᠢᠭᠠ ᠡᠴᠡ ᠴᠤ ᠣᠯᠵᠤ ᠥᠵᠡᠭᠡ ᠦᠭᠡᠶ ᠡᠨᠡ ᠴᠤᠬᠠᠭ ᠤᠳ᠂ ᠬᠠᠭᠠᠨ ᠣᠰᠤ ᠶᠢᠨ ᠡᠩᠭᠡᠷ ᠲᠤ ᠬᠠᠷᠠᠮᠰᠠᠯ ᠦᠭᠡᠶ ᠰᠢᠷᠳᠡᠭᠦ ᠳᠡᠭᠡᠨ ᠬᠠᠨᠠᠰ ᠤᠨ ᠡᠨᠡ ᠳᠡᠭ᠍ᠷᠢ ᠳᠤ ᠠᠷᠭᠠ ᠦᠭᠡᠶ ᠪᠢ ᠵᠠᠯᠪᠢᠷᠠᠨᠠᠮ ︕ ᠳᠡᠭᠡᠳᠦᠰ ᠤᠨ ᠮᠢᠨᠢ ᠥᠯᠡᠳᠡᠭᠡᠭ᠍ᠰᠡᠨ ᠴᠢᠯᠠᠭᠤ ᠭᠦᠮᠤᠨ ᠳᠠᠯᠠ ᠶᠢᠨ ᠦᠷᠤᠴᠠᠨ ᠳᠤ ᠰᠠᠭᠠᠳᠠᠨ᠂ ᠳᠠᠪᠤᠨ ᠰᠦᠷᠦᠭ᠌ ᠠᠩ ᠠᠷᠢᠶᠠᠳᠠᠨ ᠶᠢᠡᠨ ᠴᠠᠪᠴᠢᠵᠤ ᠰᠡᠢ᠌ᠯᠦᠭ᠍ᠰᠡᠨ ᠬᠠᠨᠠ ᠶᠢᠨ ᠵᠢᠷᠤᠭ᠂ ᠳᠠᠩᠴᠠᠰᠢ ᠦᠭᠡᠶ ᠪᠣᠷᠬᠠᠨ ᠤ ᠳᠤᠯᠤᠭᠠᠨ ᠭᠠᠷᠠᠯ ᠰᠠᠴᠤᠷᠠᠭᠰᠠᠨ ᠳ᠋ᠤᠩᠰᠢᠭᠤᠷ ᠵᠢᠯ ᠤᠨ ᠡᠮᠦᠨᠡᠭᠢ ᠰᠤᠨᠢᠨ ᠬᠠᠳᠠ ᠴᠢᠯᠠᠭᠤ ᠤᠳ᠂ ᠳᠡᠭ᠍ᠷᠢ ᠳᠤᠯᠤᠮᠠᠷ ᠱᠤᠬᠣᠢ᠌ᠵᠤ ᠭᠤᠷᠪᠠᠨ ᠭᠢᠯᠢ ᠳᠤ ᠰᠥᠡᠳᠡᠷᠯᠡᠭ᠍ᠰᠡᠨ ᠠᠯᠳᠠᠢ ᠨᠢᠷᠤᠭᠤ ᠶᠢᠨ ᠨᠤᠶᠠᠨ ᠣᠷᠭᠢᠯ ᠨᠥᠭᠦᠷᠯᠡᠯ ᠱᠤᠪᠬᠤ᠂ ᠠᠢ ︕ ᠨᠢ᠋ᠮᠠᠨ ᠵᠠᠭᠤᠨ ᠵᠢᠯ ᠤᠨ ᠡᠮᠦᠨᠡ ᠡᠨᠡ ᠨᠤᠳᠤᠭ ᠶᠠᠮᠠᠷ ᠪᠠᠢ᠌ᠭᠰᠠᠨ ᠪᠣᠯ ᠭᠡᠵᠤ ᠪᠣᠳᠤᠬᠤ ᠳᠤ ᠨᠠᠭᠠᠳᠤ ᠳᠠᠯᠠ ᠳᠤ ᠴᠢᠮᠡᠭᠡ ᠦᠭᠡᠶ ᠰᠤᠨᠢᠴᠢᠷᠠᠬᠤ ᠮᠢᠨᠤ ᠪᠣᠳᠤᠯ ᠳᠤ ᠶᠠᠭᠠᠭᠢᠬᠤ ᠶᠢᠨ ᠠᠷᠭᠠ ᠦᠭᠡᠶ ᠴᠢᠩᠭᠢᠰ ᠢ ᠮᠢᠨᠢ ᠨᠢᠳᠤ ᠵᠢᠷᠤᠭᠠᠯᠠᠭᠳᠠᠪᠠ᠃ ᠠᠢ ︕ ᠠᠷᠭᠠ ᠦᠭᠡᠶ ᠬᠠᠨᠠᠰ ᠤᠨ ᠭᠦᠭᠡ ᠳᠡᠭ᠍ᠷᠢ ᠳᠤ ᠵᠠᠯᠪᠢᠷᠠᠨᠠᠮ ︕
ᠬᠠᠰᠠᠭ ᠤᠨ ᠳᠠᠯᠠ ᠶᠢᠨ ᠬᠠᠨᠠᠰ ᠨᠠᠭᠤᠷ ᠤᠨ ᠭᠦᠪᠠᠭᠡ ᠳᠤ᠂ 2011 ᠣᠨ ᠤ 7 ᠰᠠᠷᠠ ᠶᠢᠨ 1 ᠊ᠤ ᠰᠦᠨᠢ
ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶᠢᠭ ᠄ ᠺᠦᠷᠡᠯᠡ ᠬᠤᠳᠠᠨᠠ
ᠵᠤᠬᠢᠶᠠᠭᠴᠢ᠄ ᠳ·ᠭᠦᠭᠡᠮᠦ᠋ᠷᠡᠨ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠨᠠᠢᠷᠠᠭᠤᠯᠤᠯᠳᠠᠷᠤᠮ᠄ 6136
ᠴᠠᠭ᠄ 2011 ᠤᠨ ᠤ 07 ᠰᠠᠷᠠ ᠶᠢᠨ 03
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ