☆ ᠪᠣᠷᠵᠢᠭᠢᠨ·ᠳᠤᠤᠯᠢ
ᠭᠠᠴᠢᠭᠳᠠᠯ
ᠭᠠᠴᠢᠭᠳᠠᠯ ᠤᠨ ᠵᠤᠪᠠᠭᠤᠷᠢ ᠪᠠᠷ ᠣᠷᠢᠶᠠᠯᠭᠠᠵᠤ
ᠭᠠᠭᠴᠠ ᠬᠤᠶᠠᠷ ᠳᠤᠰᠤᠯ ᠨᠢᠯᠪᠣᠰᠤ ᠲᠡᠶ ᠶᠠᠪᠣᠭᠠ ᠴᠠᠭ ᠳᠤ
ᠭᠠᠷ ᠶᠢᠡᠨ ᠳᠡᠯᠭᠡᠨ ᠳᠤᠰᠠᠯᠠᠵᠤ ᠳᠡᠮᠵᠢᠭᠦ ᠨᠢ ᠴᠥᠭᠡᠷᠡᠵᠤ
ᠭᠠᠳᠠᠨᠠ ᠪᠠᠨ ᠮᠡᠳᠡᠭ᠍ᠳᠡᠯ ᠦᠭᠡᠶ ᠳᠤᠳᠤᠷᠠ ᠪᠠᠨ ᠵᠢᠭ᠍ᠰᠢᠳᠡᠭ᠌ ᠨᠢ ᠣᠯᠠᠰᠢᠷᠠᠨᠠ
ᠭᠦᠮᠤᠨ ᠨᠢ ᠭᠦᠮᠤᠨ ᠤ ᠪᠠᠨ ᠪᠠᠷᠠ ᠪᠠᠷ ᠣᠷᠴᠢᠵᠤ ᠡᠷᠭᠢᠭᠦ ᠨᠡᠢ᠌ᠭᠡᠮ ᠳ᠋ᠤ
ᠠᠮᠢᠳᠤᠷᠠᠯ ᠳᠤ ᠠᠳᠠᠯᠠᠭᠳᠠᠬᠤ ᠨᠢ ᠪᠠᠭᠠᠳᠠᠵᠤ
ᠠᠮᠢᠳᠤᠷᠠᠯ ᠢ ᠠᠳᠠᠯᠠᠬᠤ ᠨᠢ ᠶᠡᠭᠡ ᠪᠣᠯᠵᠠᠢ ᠳ᠋ᠠ ᠪᠢ
ᠵᠡᠭᠡᠯᠢ ᠪᠠᠷ ᠶᠡᠭᠦᠷᠡᠭᠦ ᠭᠦᠮᠦᠰ ᠡᠴᠡ ᠵᠢᠷᠦᠭᠡᠰᠢᠶᠡᠨ ᠵᠢᠭ᠍ᠰᠢᠨ ᠵᠠᠢ᠌ᠳᠠᠵᠤ
ᠵᠠᠮ ᠳᠤ ᠡᠰᠡᠷᠭᠦᠯᠡᠭᠦ ᠳᠠᠨᠢᠯ ᠡᠴᠠ ᠪᠣᠯᠳᠠᠨ ᠵᠠᠢ᠌ᠯᠠᠨ ᠳᠤᠳᠠᠭᠠᠵᠤ
ᠵᠠᠬᠠ ᠭᠦᠪᠠᠭᠡ ᠪᠠᠷ ᠨᠢ ᠳᠤᠭᠤᠷᠢᠭᠠᠤᠨ ᠪᠠᠢ᠌ᠶᠠ ᠭᠡᠭᠦ ᠳᠤᠳᠤᠮ ᠶᠢᠡᠨ
ᠵᠠᠪᠠᠯ ᠴᠡᠭᠡᠯ ᠣᠷᠤᠭᠤ ᠨᠢ ᠵᠢᠦᠡᠭᠦᠭᠡᠳ ᠪᠠᠢ᠌ᠳᠠᠭ ᠣᠷᠴᠢᠯ ᠮᠢᠨᠢ
ᠵᠤᠪᠠᠯᠠᠩ ᠲᠡᠶ ᠭᠡᠵᠤ ᠭᠡᠯᠡᠭᠦ ᠳᠤ ᠵᠢᠷᠭᠠᠯ ᠭᠡᠳᠦᠷᠡᠭ᠍ᠰᠡᠨ ᠭᠠᠴᠢᠭᠳᠠᠯ
ᠵᠤᠭᠤᠰ ᠲᠡᠶ ᠪᠣᠯᠤᠶᠠ ᠭᠡᠭᠦ ᠳᠤᠳᠤᠮ ᠶᠢᠡᠨ ᠥᠭᠡᠢ᠌ᠷᠡᠵᠤ ᠬᠤᠭᠤᠰᠤᠷᠠᠬᠤ ᠵᠤᠯᠢᠶᠠ ᠁
ᠬᠤᠪᠴᠠᠰᠤᠨ ᠤ ᠰᠠᠢ᠌ᠬᠠᠨ ᠡᠴᠠ ᠨᠢ ᠡᠮᠦᠰᠴᠤ
ᠬᠤᠭᠤᠯᠠᠨ ᠤ ᠠᠮᠳᠠᠳᠠᠨ ᠡᠴᠠ ᠨᠢ ᠵᠤᠭᠤᠭᠯᠠᠵᠤ
ᠬᠤᠶᠠᠷᠬᠠᠨ ᠮᠥᠩᠭᠦᠨ ᠤ ᠪᠠᠨ ᠭᠦᠴᠤᠨ ᠳᠤ ᠳᠡᠭ᠍ᠷᠢ ᠳᠤᠯᠳᠠᠯᠠ ᠡᠷᠳᠡᠢ᠌ᠵᠤ
ᠬᠤᠪᠢ ᠶᠢᠨ ᠦᠷᠦᠭᠡᠯ ᠤᠨ ᠢᠯᠭᠠᠯ ᠦᠭᠡᠶ ᠪᠠᠷᠢᠭᠠᠳᠠ ᠶᠢᠨ ᠭᠡᠰᠢᠭ᠌ ᠰᠢᠭ᠌ ᠭᠡᠢ᠌ᠰᠭᠡᠨᠡ
ᠠᠷᠢᠭᠢᠨ ᠤ ᠮᠤᠬᠤᠯᠠᠭ ᠢ ᠠᠯᠢ ᠴᠠᠪᠠᠷ ᠡᠴᠡ ᠨᠢ ᠰᠤᠩᠭ᠋ᠤᠨ ᠶᠠᠩᠪᠠᠷᠬᠠᠵᠤ
ᠠᠬᠠ ᠳᠡᠭᠦᠤ ᠶᠠᠪᠣᠯᠴᠠᠭᠠᠨ ᠤ ᠠᠷᠪᠠᠳᠤᠭᠤᠯᠠ ᠬᠤᠷᠢᠳᠤᠭᠤᠯᠠ ᠪᠠᠨ
ᠠᠯᠢᠮᠠ ᠵᠢᠮᠢᠰ ᠰᠢᠭ᠌ ᠡᠩ ᠤᠨ ᠶᠠᠭᠤᠮᠠᠨ ᠳᠤ ᠨᠢᠳᠤ ᠱᠦᠷᠭᠦᠯ ᠦᠭᠡᠶ ᠥᠩᠭᠡᠷᠡᠨ
ᠠᠯᠢ ᠦᠭᠡᠶ ᠬᠤᠪᠣᠷ ᠳ᠋ᠤᠨᠢ ᠬᠤᠷᠤᠬᠠᠢ᠌ᠳᠤᠵᠤ ᠪᠠᠭᠤᠨᠠ
ᠠᠷᠪᠠᠳᠤ ᠵᠠᠭᠤᠳᠤ ᠶᠢ ᠠᠯᠠᠭᠠᠨ ᠤ ᠴᠢᠨᠡᠭᠡ ᠪᠠᠷ ᠪᠠᠷᠢᠨᠠ
ᠠᠭᠤᠤ ᠣᠷᠴᠢᠯᠠᠩ ᠳᠤ ᠭᠦᠮᠤᠨ ᠪᠣᠯᠤᠭᠰᠠᠨ ᠠᠭᠤᠳᠠᠮᠴᠢ ᠪᠠᠨ ᠭᠠᠢ᠌ᠬᠠᠭᠤᠯᠤᠨᠠ
ᠰᠢᠷᠠ᠂ ᠬᠠᠷᠠ᠂ ᠣᠯᠠᠭᠠᠨ ᠡᠴᠠ ᠨᠢ ᠰᠢᠯᠢᠵᠤ
ᠰᠢᠮᠠ ᠶᠢᠨ ᠳᠡᠭᠡᠳᠤ ᠶᠠᠭᠤᠮᠠ ᠪᠣᠯᠭᠠᠨ ᠵᠠᠯᠭᠢᠯᠠᠨᠠ
ᠣᠤᠭᠤᠵᠤ ᠣᠤᠭᠤᠭᠰᠠᠭᠠᠷ ᠣᠯᠠᠭᠠᠨ ᠵᠡᠭᠡᠷᠳᠡ ᠪᠣᠯᠤᠨᠠ
ᠣᠳᠠᠬᠤ ᠦᠭᠡᠶ ᠪᠠᠢ᠌ᠭᠰᠠᠭᠠᠷ ᠣᠯᠠᠭᠠᠨ ᠭᠠᠯᠵᠠᠭᠤ ᠪᠣᠯᠤᠨᠠ
ᠣᠰᠤᠨ ᠤ ᠣᠷᠤᠰᠬᠠᠯ ᠰᠢᠭ᠌ ᠢᠯᠭᠤᠮ ᠮᠤᠩᠭ᠋ᠤᠯ ᠥᠭᠡ ᠪᠠᠨ
ᠣᠷᠠᠵᠤ ᠮᠠᠷᠠᠵᠤ ᠬᠤᠯᠢᠵᠤ ᠬᠤᠤᠠᠬᠤᠵᠤ ᠶᠠᠷᠢᠨᠠ
ᠰᠠᠶᠢ ᠶᠢᠨ ᠭᠡᠯᠡᠭ᠍ᠰᠡᠨ ᠶᠢᠡᠨ ᠰᠠᠨᠠᠭᠠᠨ ᠳᠠᠪᠠ ᠪᠠᠷ ᠶᠢᠡᠨ ᠳᠠᠭᠢᠭᠠᠤᠨ ᠳᠠᠪᠳᠠᠨᠠ
ᠰᠠᠭᠰᠠᠭᠤ ᠨᠢ ᠭᠡᠳᠦᠷᠡᠭᠡᠳ ᠪᠠᠷᠭᠢᠷᠠᠭᠠᠤᠨ ᠦᠵᠡᠨᠡ᠂ ᠪᠠᠯᠪᠠᠭᠠᠤᠨ ᠴᠤ ᠳᠠᠭᠤᠰᠤᠨᠠ
ᠳᠡᠭᠡᠭᠦ ᠳ᠋ᠤ
ᠰᠠᠷᠠ ᠶᠢᠨ ᠴᠠᠯᠢᠩ ᠰᠠᠨᠠᠭᠠᠨ ᠡᠴᠠ ᠭᠠᠳᠠᠭᠤᠷ ᠬᠤᠭᠤᠰᠤᠷᠠᠵᠤ
ᠰᠠᠷᠠ ᠶᠢᠨ ᠵᠤᠪᠠᠯᠠᠩ ᠳᠤ ᠰᠡᠳᠭᠢᠯ ᠶᠢᠡᠷ ᠣᠨᠠᠨ ᠡᠭᠢᠯᠡᠨᠡ
ᠬᠤᠤᠷ ᠰᠢᠭ ᠶᠠᠭᠤᠮᠠ ᠶᠢ ᠣᠰᠤ ᠰᠢᠭ ᠵᠠᠯᠭᠢᠯᠠᠵᠤ
ᠣᠬᠠᠭᠠ ᠠᠯᠳᠠᠵᠤ ᠣᠨᠠᠨ ᠭᠦᠮᠤᠨ ᠡᠴᠡ ᠪᠠᠨ ᠭᠠᠷᠤᠭᠰᠠᠨ ᠤ ᠮᠠᠷᠭᠠᠰᠢ ᠨᠢ
ᠬᠤᠷᠤᠰᠤᠯ ᠭᠤᠨᠢᠭ ᠵᠦᠷᠢᠴᠠᠯᠳᠤᠵᠤ ᠰᠡᠳᠭᠢᠯ ᠶᠢᠡᠷ ᠳᠦᠭᠦᠷᠡᠩ ᠱᠤᠤᠭᠢᠯᠳᠤᠨ
ᠳᠤᠷᠭᠠ ᠰᠢᠭ ᠠᠮᠢᠳᠤᠷᠠᠯ ᠶᠢᠡᠨ ᠳᠤᠭᠤᠭᠠᠨ ᠤ ᠭᠦ ᠰᠢᠭ᠌ ᠰᠠᠨᠠᠵᠤ
ᠳᠤᠷᠳᠤᠩ ᠵᠠᠯᠠᠭᠤ ᠨᠠᠰᠤ ᠪᠠᠨ ᠳᠤᠭᠤᠰᠬᠠᠨ ᠤ ᠪᠠᠯᠪᠠᠷᠬᠠᠢ ᠳᠤ ᠭᠠᠷᠭᠠᠨᠠ
ᠢᠩᠭᠢᠭᠦ ᠳ᠋ᠤ
ᠦᠷᠦᠭᠡᠯ ᠢ ᠬᠠᠷᠠᠬᠤ ᠳᠤ ᠦᠪᠡᠷ ᠡᠴᠡ ᠮᠢᠨᠢ ᠪᠠᠶᠠᠨ
ᠦᠴᠦᠭᠡᠨ ᠶᠠᠳᠠᠭᠤ ᠶᠢᠨ ᠭᠤᠳᠤᠮᠵᠢᠨ ᠳᠤ ᠭᠠᠭᠴᠠᠭᠠᠷ ᠪᠢ ᠰᠢᠭ
ᠨᠠᠷᠠ ᠨᠢ ᠭᠡᠷᠡᠯ ᠶᠢᠡᠨ ᠬᠠᠷᠠᠮᠨᠠᠭᠠ ᠦᠭᠡᠶ ᠰᠢᠳᠠᠭᠠᠮᠠ ᠰᠢᠷᠠᠵᠤ ᠪᠠᠢ᠌ᠬᠤ ᠳ᠋ᠤ
ᠣᠳᠤ ᠨᠢ ᠡ᠊ᠨᠳᠡᠭᠦᠷᠡᠵᠤ ᠨᠢᠭᠡ ᠳᠤᠳᠠᠭᠠ ᠦᠭᠡᠶ ᠪᠠᠢ᠌ᠬᠤ ᠳ᠋ᠤ
ᠣᠷᠴᠢᠯᠠᠩ ᠳᠤ ᠪᠢ ᠭᠠᠭᠴᠠᠭᠠᠷ ᠶᠢᠡᠨ ᠳᠦᠭᠡᠷᠢᠴᠢᠭᠡᠭ᠍ᠰᠡᠨ ᠶᠤᠮ ᠰᠢᠭ᠌
ᠣᠠᠳᠠᠬᠤ ᠦᠷᠦᠭᠡ ᠣᠷᠤ ᠳᠠᠷᠠ ᠴᠢᠪᠳᠡᠭ᠌ ᠭᠦᠢᠳᠡᠨ
ᠣᠤᠭᠤᠭᠴᠢ ᠣᠰᠤ ᠠᠶᠠᠭᠠ ᠴᠠᠢ ᠡᠭᠡᠭᠦᠨ ᠭᠠᠰᠢᠭᠤᠨ
ᠳᠠᠭᠤᠤ ᠰᠢᠩᠭᠡᠯᠳᠡ ᠡᠴᠡ ᠳᠠᠭᠤᠳᠠᠭᠤᠷ ᠬᠠᠷᠢᠯᠴᠠᠭᠤᠷ ᠭᠦᠷᠳᠡᠯᠡ
ᠳᠤᠳᠠᠭᠤ ᠪᠢᠴᠢᠭ᠍ᠰᠡᠨ ᠰᠢᠯᠦᠭ᠌ ᠬᠠᠭᠠᠰ ᠥᠵᠡᠭ᠍ᠰᠡᠨ ᠨᠤᠮ
ᠠᠷᠭᠠ ᠶᠠᠳᠠᠬᠤ ᠳᠠᠭᠠᠨ ᠠᠩᠬᠠᠨ ᠤ ᠢᠨᠠᠭ ᠤᠨ ᠮᠢᠨᠢ ᠵᠠᠭᠢᠳᠠᠯ ᠡᠴᠠ
ᠠᠮᠠᠷᠠᠭ ᠤᠨ ᠮᠢᠨᠢ ᠠᠪᠣᠭᠤᠯᠤᠭᠰᠠᠨ ᠰᠠᠷᠠᠨ ᠰᠢᠭ ᠰᠠᠢ᠌ᠬᠠᠨ ᠰᠡᠭᠦᠳᠡᠷ ᠴᠤ
ᠠᠯᠢ ᠪᠦᠭᠦᠨ ᠠᠮᠢᠨ ᠤ ᠭᠢ ᠡᠴᠡ ᠠᠰᠳᠠᠭᠠᠨ ᠳᠤ ᠭᠠᠷᠴᠤ
ᠠᠮᠤᠷᠯᠢᠩᠭ᠋ᠤᠢ ᠡᠨᠡ ᠬᠤᠷᠸᠠ ᠶᠢ ᠠᠷᠠᠭᠠ ᠰᠢᠳᠤ ᠨᠢᠭᠦᠯ ᠭᠢᠯᠢᠠᠴᠠ ᠪᠣᠯᠭᠠᠨᠠ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠮᠢᠨᠢ ᠭᠠᠴᠢᠭᠳᠠᠯ
ᠭᠠᠴᠢᠭᠳᠠᠯ ᠭᠡᠭᠦ ᠡᠴᠡ ᠡᠯᠢᠭᠡ ᠪᠠᠷ ᠶᠢᠡᠨ ᠳᠠᠷᠤᠨ ᠥᠭᠦᠭ᠍ᠰᠡᠨ ᠶᠤᠮ ᠰᠢᠭ᠌ ᠣᠨᠠᠭᠰᠠᠨ
ᠦᠵᠡᠯ ᠰᠠᠨᠠᠭᠠ ᠭᠢᠳᠠᠯ ᠠᠵᠢᠯ ᠤᠨ ᠶᠡᠭᠡ ᠬᠤᠭᠤᠰᠤᠷᠠᠯ
ᠦᠨᠦ ᠮᠠᠷᠭᠠᠰᠢ ᠦᠨᠡᠨ ᠬᠤᠳᠠᠯ ᠵᠦᠷᠢᠴᠠᠯᠳᠤᠵᠤ ᠬᠤᠤᠠᠬᠤᠭᠰᠠᠨ ᠨᠡᠢ᠌ᠭᠡᠮ ᠢ
ᠥᠵᠦᠭᠦᠷ ᠭᠢᠵᠠᠭᠠᠷ ᠦᠭᠡᠶ ᠦᠷᠭᠦᠯᠵᠢᠯᠡᠭ᠍ᠰᠡᠨ ᠭᠠᠵᠠᠷ ᠣᠰᠤ ᠪᠠᠨ ᠰᠢᠭ ᠰᠠᠨᠠᠵᠤ
ᠴᠠᠭᠢᠯᠠᠭᠠᠤᠨ ᠥᠩᠭᠡᠷᠡᠭ᠍ᠰᠡᠨ ᠠᠶᠤᠩᠭᠠ ᠰᠢᠭ ᠳᠦᠷᠭᠡᠨ ᠥᠩᠭᠡᠷᠡᠭᠦ ᠴᠠᠭ ᠮᠦᠴᠡ ᠵᠢ
ᠴᠠᠷᠴᠠᠭᠤ ᠪᠣᠳᠤᠯ ᠭᠦᠯᠳᠡᠭᠦᠤ ᠳᠠᠷᠢᠭᠢ ᠪᠠᠷ ᠰᠡᠳᠭᠢᠭ᠍ᠰᠡᠨ ᠤ ᠮᠢᠨᠢ ᠲᠦᠯᠦᠭᠡᠰᠤ
ᠳᠤᠤᠷ ᠰᠦᠯᠵᠢᠶᠠ ᠠᠭᠠᠷ ᠭᠠᠵᠠᠷ ᠶᠢᠡᠷ ᠶᠠᠭᠰᠢᠵᠤ
ᠳᠤᠭᠤᠯᠯᠠᠨ ᠮᠠᠳᠠᠳᠠᠯᠠ ᠲᠦᠮᠡᠨ ᠰᠢᠨᠡ ᠨᠡᠮᠡᠭ᠍ᠳᠡᠵᠤ ᠪᠣᠢ ᠨᠡᠢ᠌ᠭᠡᠮ ᠢ
ᠳᠤᠭᠤᠯ ᠬᠠᠷᠢᠭᠤᠯᠠᠭᠰᠠᠨ ᠪᠠᠭᠠ ᠨᠠᠰᠤᠨ ᠤ ᠪᠠᠨ ᠠᠮᠢᠳᠤᠷᠠᠯ ᠰᠢᠭ ᠶᠢᠡᠨ ᠰᠠᠨᠠᠭᠰᠠᠨ ᠤ ᠮᠢᠨᠢ ᠦᠷᠢ
ᠠᠭᠤᠤ ᠶᠡᠭᠡ ᠶᠢ ᠭᠦᠰᠡᠮᠵᠢᠯᠡᠨ ᠨᠣᠢ᠌ᠷ ᠦᠭᠡᠶ ᠬᠤᠨᠤᠬᠤ ᠰᠦᠨᠢ
ᠠᠮᠢᠳᠤ ᠶᠢᠨ ᠰᠠᠢ᠌ᠬᠠᠨ ᠴᠠᠭ ᠲᠤ ᠳᠡᠭᠦᠨ ᠡᠴᠡ ᠭᠡᠳᠦᠷᠡᠭ᠍ᠰᠡᠨ ᠵᠢᠷᠭᠠᠯ ᠪᠠᠢ᠌ᠬᠤ ᠥᠭᠡᠢ
ᠠᠯᠢᠮᠠᠢ᠌ᠷᠠᠨ ᠳᠠᠯᠢᠮᠠᠢ᠌ᠷᠠᠨ ᠬᠤᠵᠢᠭᠤ ᠪᠣᠰᠤᠭᠰᠠᠨ ᠦᠷᠯᠦᠭᠡ
ᠠᠭᠢᠵᠤ ᠡᠷᠭᠢᠭᠦ ᠦᠭᠡᠶ ᠴᠠᠭ ᠮᠦᠴᠡ ᠣᠷᠤᠯᠠᠵᠤ ᠪᠣᠯᠤᠰᠢ ᠦᠭᠡᠶ ᠠᠯᠳᠠᠭᠠ ᠁
ᠪᠣᠳᠤᠯ ᠤᠨ ᠭᠦᠯᠦᠭ᠌ ᠪᠣᠯᠭᠢᠭᠠ ᠪᠣᠳᠠᠳᠠᠢ ᠣᠨᠤᠭᠠ ᠪᠦᠳᠦᠷᠢᠭᠡ
ᠪᠠᠭᠤᠭᠠᠤᠨ ᠴᠤ ᠪᠣᠯᠬᠤ ᠦᠭᠡᠶ ᠮᠤᠷᠳᠠᠭᠠᠤᠨ ᠴᠤ ᠪᠣᠯᠬᠤ ᠥᠭᠡᠢ
ᠶᠠᠰᠤ ᠨᠠᠷᠠ ᠶᠢᠨ ᠳᠡᠩᠨᠡᠭᠦᠷ ᠳᠡᠭᠡᠷᠡ
ᠪᠠᠭᠠ ᠭᠡᠳᠦᠷᠡᠪᠠᠯ ᠳᠤᠭᠳᠠᠭᠠᠯ ᠦᠭᠡᠶ ᠬᠠᠤᠯᠢ ᠳᠤᠮᠳᠠᠭᠤᠷ
ᠪᠠᠳᠠᠭ ᠪᠠᠳᠠᠭ ᠰᠢᠯᠦᠭ᠌ ᠰᠢᠭ᠌ ᠬᠤᠭᠤᠰᠤᠨ ᠪᠦᠭᠦᠨ ᠤ ᠭᠤᠤᠯ ᠵᠢᠠᠷ
ᠪᠠᠰᠠ ᠨᠠᠷᠠ ᠲᠡᠶ ᠮᠦᠷ ᠲᠡᠶ ᠭᠦᠮᠤᠨ ᠭᠡᠵᠤ ᠶᠠᠪᠣᠬᠤ ᠶᠤᠮ ᠪᠢ
ᠶᠠᠭᠤ ᠶᠢ ᠭᠢᠶᠠ ᠭᠡᠵᠤ ᠶᠠᠭ ᠪᠣᠳᠤᠬᠤ ᠦᠭᠡᠶ ᠦᠶᠡ ᠳ᠋ᠤ
ᠶᠠᠮᠠᠷ ᠨᠢᠭᠡᠨ ᠨᠢ ᠢᠯᠡᠭᠦᠳᠡᠭᠡᠳ ᠵᠤᠪᠠᠭᠠᠤᠨ ᠪᠠᠢ᠌ᠬᠤ ᠨᠢ ᠭᠡᠴᠡᠭᠦᠤ
ᠶᠠᠭᠠᠷᠠᠨ ᠰᠠᠠᠳᠤᠷᠴᠤ ᠵᠡᠭᠦᠨ ᠪᠠᠷᠠᠭᠤᠨ ᠶᠢᠡᠨ ᠢᠯᠭᠠᠨ ᠠᠮᠵᠢᠬᠤ ᠦᠭᠡᠶ ᠴᠠᠭ ᠳᠤ
ᠶᠠᠯᠢᠮ ᠦᠭᠡᠶ ᠪᠠᠭᠠᠬᠠᠨ ᠨᠢ ᠴᠤ ᠳᠤᠳᠠᠴᠢᠬᠠᠭᠠᠤᠨ ᠰᠢᠨᠠᠯᠠᠭᠠᠤᠨ ᠪᠠᠢ᠌ᠬᠤ ᠨᠢ ᠵᠢᠷᠭᠠᠯ
ᠠᠢ︕ ᠠᠮᠢᠳᠤᠷᠠᠯ ᠮᠢᠨᠢ᠂ ᠨᠠᠰᠤ ᠮᠢᠨᠢ᠂ ᠳᠠᠪᠢᠯᠠᠩ ᠮᠢᠨᠢ᠂
ᠰᠠᠶᠠ ᠲᠦᠮᠡᠨ ᠣᠨ ᠤ ᠳᠡᠦᠭᠡ ᠶᠢᠨ ᠬᠤᠷᠯᠤ ᠮᠢᠨᠤ︕
2003 ᠣᠨ 12 ᠰᠠᠷᠠ ᠶᠢᠨ 16 ᠨᠠ
ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶᠢᠭ᠄ ᠭᠦᠯᠤᠨ ᠪᠣᠢ᠌ᠷ ᠳᠡᠭᠡᠳᠤ ᠰᠤᠷᠭᠠᠭᠤᠯᠢ
ᠵᠤᠬᠢᠶᠠᠭᠴᠢ᠄ ᠪᠣᠷᠵᠢᠭᠢᠨ·ᠳᠤᠤᠯᠢ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 2634
ᠴᠠᠭ᠄ 2010 ᠤᠨ ᠤ 09 ᠰᠠᠷᠠ ᠶᠢᠨ 14
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ